Prej mëngjesit të sotëm ka nisur zyrtarisht shpërndarja e materialeve zgjedhore në Komisionin Zonal të Administrimit Zgjedhor nr. 70, që mbulon 106 Qendra Votimi në qytetin e Pogradecit, në Mokër si edhe në fshatrat e Sipërm dhe të Poshtëm.

Sipas përfaqësuesve të partive politike në komisionet përkatëse, procesi i tërheqjes së kutive të votimit dhe materialeve shoqëruese po zhvillohet në përputhje me afatet dhe pa asnjë incident.

Materialet do të transportohen në çdo qendër votimi brenda ditës së sotme, në mënyrë që gjithçka të jetë gati për nesër, dita e votimeve. Sipas autoriteteve, objektet ku do të ruhen materialet zgjedhore deri në hapjen e votimit do të jenë nën mbikëqyrje të rreptë të Policisë së Shtetit, për të garantuar sigurinë dhe integritetin e procesit.