Policia e Durrësit ka reaguar për ngjarjen e ndodhur më 14 gusht në lagjen nr.13, ku mbeti i lënduar një shtetas austriak me kombësi rumune, A.D. Sipas njoftimit, rreth orës 15:30, ai u dhunua nga pesë persona për motive të dobëta.

Pas kallëzimit të shtetasit A.D., forcat e rendit kryen menjëherë veprimet hetimore dhe identifikuan dy 17-vjeçarë të cilët dyshohet se kanë kryer dhunën. Pas konsultimit me prokurorin, ata u proceduan në gjendje të lirë për veprën penale “Dëmtime të tjera me dashje”.

Policia thekson se hetimet vazhdojnë për të identifikuar dhe nxjerrë para përgjegjësisë penale edhe personat e tjerë të përfshirë në këtë rast.