Fier – Policia e Fierit ka goditur dy raste të zjarrvënies në zonat e Vjosës dhe Lushnjës, duke arrestuar dy shtetas, Shezai Banaj dhe Arjan Kaja.

Shtetasi Shezai Banaj, 61 vjeç, banues në fshatin Cakran, dyshohet se ndezi zjarr në luginën e lumit Vjosa, në vendin e quajtur “Mezarak”. Si pasojë e flakëve janë djegur një sipërfaqe e konsiderueshme toke, rreth 300 pemë ulliri dhe bimësi në parkun kombëtar. Ai akuzohet për “Shkatërrim të pronës me zjarr” dhe “Dëmtim të habitateve në zonat e mbrojtura mjedisore”.

Ndërkohë, shtetasi Arjan Kaja, 58 vjeç, banues në fshatin Dushk, u arrestua pasi dyshohet se ndezi zjarr në tokën e tij në fshatin Dushk, duke penguar zjarrfikësit gjatë përpjekjeve për shuarjen e flakëve. Ai akuzohet për “Shkatërrim të pronës me zjarr” dhe “Kundërshtim të punonjësit që kryen një detyrë shtetërore ose shërbim publik”.

Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Fier për veprime të mëtejshme.

Drejtoria Vendore e Policisë Fier apelon sërish te qytetarët që të mos ndezin zjarre, duke paralajmëruar se çdo shkelës do të përballet me pasoja penale. Qytetarët ftohen të denoncojnë çdo veprimtari të tillë në numrin 112, me garanci për anonimat, reagim të shpejtë dhe të paanshëm.