Agjentët e Policisë Kombëtare dhe Bashkiake të Madridit kanë arrestuar pesë persona më 27 tetor, të dielën, për vjedhjen e një dyqani-depo metalesh të çmuara, përfshirë diamante, në zonën Fuente del Berro të Salamanca. Dy nga të arrestuarit janë shqiptarë, ndërsa tre të tjerë janë spanjollë. Të arrestuarit janë nga 30 deri në 45 vjeç dhe kanë dosje të shumta policie për vepra penale të ndryshme.

Sipas raportimeve, brenda depos ishin sasi të mëdha me shufra ari, metale të çmuara dhe monedha. Hajdutët kishin hapur një vrimë rreth 70 centimetra në një mur nga një godinë e ngjitur me dyqanin, duke përdorur metodën e njohur si “butrón” (hapja e vrimës në mur). Fqinjët e dyqanit, duke dëgjuar diçka të çuditshme, lajmëruan policinë.

Pas marrjes së njoftimit, agjentët arritën në vendngjarje dhe vendosën një pajisje “kafaz” për të parandaluar ikjen e hajdutëve me floririn e vjedhur. Pas sigurimit të zonës dhe hyrjes në dyqan, ata gjetën pesë personat të fshehur në katin e sipërm dhe i arrestuan menjëherë si përgjegjës për krimin e grabitjes.

Emrat e të arrestuarve nuk janë bërë të ditur ende në media. Të arrestuarit ishin të veshur me doreza dhe kapuç, dhe në një automjet të parkuar në rrugë u gjetën sende materiale dhe pajisje që shërbenin si prova të veprës penale.