Policia e Përmetit njoftoi se ka ndihmuar shtatë turistë nga Gjermania dhe Polonia, të cilët kishin mbetur të bllokuar në kanionin e Langaricës pas reshjeve të rrëmbyeshme të shiut.

Sipas njoftimit, turistët ishin ndodhur në zonën e quajtur “Shpella e Pëllumbave” dhe kishin mbetur të bllokuar në kanion për shkak të rritjes së nivelit të ujit në lumin e Langaricës.

Menjëherë pas marrjes së njoftimit, shërbimet e Policisë së Përmetit, në bashkëpunim me zjarrfikësit dhe shërbimet e zonave të mbrojtura, janë nisur në vendngjarje dhe kanë bërë të mundur shpëtimin e turistëve. Të gjithë ata janë në gjendje të mirë shëndetësore dhe kanë shprehur falënderimet e tyre për shërbimet e policisë dhe ndihmën e dhënë në kohë rekord.

Policia e Gjirokastrës theksoi angazhimin e saj për shërbim ndaj qytetarëve dhe vizitorëve, duke ftuar që për çdo rast nevoje për ndihmë, të telefonojnë në numrin pa pagesë 112.