Policia e Shtetit ka paralajmëruar qytetarët për rrezikun e mesazheve mashtruese që mund të marrin në platformën e komunikimit WhatsApp. Sipas një deklarate për mediat, këto mesazhe përmbajnë linqe që kërkojnë regjistrimin ose votimin në evenimente të ndryshme fiktive, duke premtuar përfitime të ndryshme për ata që i plotësojnë ato.

Policia thekson se këto mesazhe kanë si qëllim që të orientojnë përdoruesit e WhatsApp drejt linqeve mashtruese, të cilat mund të çojnë në humbjen e kontrollit mbi profilet e tyre. Veçanërisht, llogaritë e mashtruara mund të keqpërdoren për qëllime të tjera të paligjshme.

Në rast se qytetarët marrin të tilla mesazhe, Policia e Shtetit u rekomandon të mos i hapin, të mos klikojnë asnjë lidhje dhe të mos plotësojnë asnjë informacion personal. Për më tepër, ato duhet të fshihen menjëherë. Policia gjithashtu u bën thirrje atyre që kanë rënë pre e këtyre mashtrimeve të paraqiten në zyrat e Policisë së Shtetit, në strukturat e Krimit Kibernetik, për të denoncuar rastet dhe për të ndihmuar në identifikimin dhe ndëshkimin e autorëve të këtij aktiviteti kriminal.

Qytetarët duhet të jenë të kujdesshëm, pasi mesazhet mund të vijnë nga numra të huaj, si dhe nga kontakte që mund të kenë pasur të hakëruara.