Policia e Shtetit ka reaguar pas intervistës së Emirion Mandrejas, i cili akuzoi efektivët e komisariatit të Rrëshenit, përfshirë ish-shefin Klodian Kondi, për dhunë fizike gjatë një ngjarjeje të ndodhur më shumë se një vit më parë.

Në një deklaratë zyrtare, policia pranon ndalimin e tij më 17 janar 2024, por thotë se Mandreja ka refuzuar të tregojë dokumentin e identifikimit dhe ka mbajtur “qëndrim sfidues dhe agresiv verbal”, gjë që çoi në shoqërimin e tij.

Sipas policisë, gjatë qëndrimit në ambientet e komisariatit, Mandreja “ka ofenduar, kërcënuar dhe tentuar të godasë punonjësit e policisë”, përfshirë ish-shefin e komisariatit. Në reagim thuhet gjithashtu se ai ka dëmtuar veten duke goditur murin dhe tavolinën, veprime që sipas autoriteteve janë dokumentuar dhe përfshirë në dosjen hetimore.

Pas ngjarjes, Klodian Kondi ka bërë kallëzim penal për goditje për shkak të detyrës, ndërsa Mandreja është arrestuar për “Kundërshtim të punonjësit të policisë së rendit publik”. Pamjet filmike të incidentit i janë dorëzuar Agjencisë së Mbikëqyrjes Policore.

Policia thotë se pretendimet e Mandrejas janë publike, por “ngjarja është dokumentuar me prova dhe deklarime zyrtare”.