Vlora – Policia e Vlorës ka goditur një rast të shfrytëzimit të shtetaseve të huaja për prostitucion në lagjen “Uji i Ftohtë”, duke identifikuar një organizatore dhe arrestuar dy gra dhe dy klientë.

Sipas uniformave blu, aktiviteti ilegal zhvillohej në një apartament të marrë me qira. Organizatore e veprimtarisë kriminale është shpallur në kërkim shtetasja kineze M.Y., 36 vjeçe, e dyshuar për “Trafikim të personave të rritur”.

Në pranga kanë rënë dy gra kineze që ushtronin prostitucion: Q.Zh., 49 vjeçe, dhe X.L., 42 vjeçe. Po ashtu, janë arrestuar edhe dy klientë, një shqiptar 38-vjeçar dhe një italian 25-vjeç, të cilët u kapën në ambientet ku ushtrohej prostitucioni.

Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme ligjore. Policia njofton se vijon puna për kapjen e shtetases së shpallur në kërkim dhe dokumentimin e plotë të veprimtarisë kriminale.