Policia e Vlorës, në bashkëpunim me Prokurorinë e Sarandës, ka sekuestruar pasuri me vlerë rreth 12 milionë euro në Sarandë, të dyshuara si të përfituara nga veprimtari kriminale. Në qendër të hetimit janë Kristi Qirici (alias Jetmir Hoxha), vëllai i biznesmenit të vrarë Edmond Papa, dhe Adriatik Kalemi, i dyshuar si organizatori i vrasjes së Papës.

Sekuestro janë vendosur ndaj dy hoteleve luksoze të Qiricit në Sarandë, përfshirë “Blu Sky”, ku më parë kishte qëndruar viktima e një tjetër vrasjeje, Aleksandër Sadikaj. Hetuesit dyshojnë se Qirici dhe familja e tij kanë qenë të përfshirë në këtë ngjarje, e cila më pas çoi në një spiralë hakmarrjesh.

Ndërkohë, Kalemit i janë sekuestruar prona në Sarandë, Tiranë, Rradhimë dhe Memaliaj, përfshirë lokale, apartamente, toka, pasuri ndërtimore, një mjet lundrues, katër automjete dhe 12 llogari bankare. Ky person ka një të kaluar kriminale të gjatë, duke përfshirë ekzekutimin e vëllezërve Çaça në Belgjikë më 2001 dhe përfshirje në ngjarje të dhunshme në Shqipëri dhe Greqi.

Hetimet janë në vazhdim për të verifikuar origjinën e fondeve dhe për të identifikuar të gjithë personat e përfshirë në këto veprimtari kriminale.