Zëdhënësja e Antikorrupsionit në Partinë Demokratike, Genta Vangjeli, ka reaguar sot ashpër ndaj Ministrisë së Brendshme dhe aksioneve të fundit të IKMT-së, duke i cilësuar ato si “shfaqje publike për propagandë”.

Në një deklaratë për mediat, Vangjeli tha se ministrja Albana Koçiu, e shoqëruar nga drejtues të lartë të Policisë dhe Bashkisë së Tiranës, “inskenoi një tjetër show pranë Liqenit të Thatë për të treguar përkushtimin e rremë kundër ndërtimeve pa leje”.

Sipas saj, nëse aksioni do të ishte i sinqertë, “Ministrja duhet ta kishte nisur vetëm pak metra larg zyrës së saj, aty ku po ngrihen kullë pas kulle në qendër të Tiranës”.
Vangjeli përmendi disa prej ndërtimeve më të fundit në kryeqytet, si “Tirana’s Rock”, “Book Building”, “Eyes of Tirana” dhe “Kulla Pyll”, duke akuzuar qeverinë se pas tyre fshihen skema të pastrimit të parave.

Ajo shtoi se në shtatë vitet e fundit janë dhënë leje ndërtimi për rreth 12 milionë metra katrorë, kryesisht në qendër të Tiranës, ndërsa asnjë aksion i qeverisë “nuk guxon të afrohet te kullat, pasi pas tyre qëndron vetë Edi Rama”.

Në përfundim, Partia Demokratike i bëri thirrje SPAK-ut që të hetojë me urgjencë lejet e ndërtimit, burimet e fondeve dhe lidhjet midis ndërtuesve e zyrtarëve të lartë shtetërorë.