Athinë, 15 shkurt 2025 – Policia greke ka arritur të shkatërrojë një grup kriminal të përfshirë në gjobëvënie ndaj bizneseve në Athinë, duke arrestuar pesë shtetas, mes të cilëve 3 shqiptarë, njëri prej të cilëve është pjesë e grupit famëkeq “Lions”. Ata u arrestuan në një dyqan në Kato Patisia më 12 shkurt 2025, pasi u lokalizuan nga forcat e policisë, pavarësisht reagimeve të dhunshme nga ana e të dyshuarve.

Të arrestuarit janë:
•Ukshim Hoti, 41 vjeç, nga Tirana
•Roland Kadiu, 43 vjeç, nga Klosi
•Nexhmi Murataj, 42 vjeç, nga Kota e Selenicës
•Një 34-vjeçar grek
•Një 38-vjeçar egjiptian

Të gjithë janë akuzuar për organizim kriminal, tentativë gjobvënieje, dhunë ndaj zyrtarëve dhe shkelje të legjislacionit për armët.

Grupi kriminal operonte në zona të ndryshme të Athinës, duke kërkuar para nga pronarët e dyqaneve për “mbrojtje”, duke përdorur kërcënime dhe dhunë për të penguar denoncimet. Ata janë përfshirë gjithashtu në një aktivitet të jashtëligjshëm që ka përfshirë vjedhje dhe veprime të tjera kriminale, përfshirë trafikun e drogës dhe mbrojtjen e lokaleve të natës.

Pas arrestimit, policia greke sekuestroi një sasi armësh dhe mjete të tjera, duke përfshirë makina, motoçikleta, thika, jelek luftarak, pistoletë, dhe 6.900 euro. Hetimet kanë zbuluar gjithashtu se grupi kishte zhvatur para nga katër pronarë dyqanesh në Athinë.

Nexhmi Murataj është gjithashtu një anëtar i “Lions”, një grup kriminal shqiptar që ka operuar në Athinë për vite me radhë dhe ka qenë i përfshirë në ngjarje të rënda, përfshirë vrasjen e Pëllumb Islamit në Nea Ionia më 21 shkurt 2023. Grupi ka lidhje të forta me botën e krimit dhe dyshohet se ka marrë mbështetje nga individë të fuqishëm brenda burgjeve greke.