Një ndërhyrje e shpejtë dhe profesionale e Policisë Kufitare të Dhërmiut ka bërë të mundur lokalizimin dhe shpëtimin e dy turistëve kanadezë të humbur në zonën e Karaburunit, mbrëmjen e djeshme, më 18 maj 2025.

Rreth orës 23:00, salla operative e Drejtorisë Vendore për Kufirin dhe Migracionin (DVKM) Vlorë u njoftua se dy shtetas nga Kanadaja, të ndarë nga grupi i tyre gjatë një ecjeje në zonën malore të Karaburunit, kishin humbur orientimin dhe nuk dinin si të ktheheshin.

Policia Kufitare Dhërmi reagoi menjëherë duke nisur një mjet lundrues drejt Gjirit të Gramës. Pas mbërritjes në vendngjarje, efektivët vijuan kërkimet në këmbë, në terren të vështirë dhe në errësirë totale. Rreth orës 24:00, ata arritën të lokalizonin dhe gjenin turistët, të cilët fatmirësisht ndodheshin në gjendje të mirë shëndetësore.

Turistët u shoqëruan në Gjirin e Gramës, ku iu bashkuan grupit të tyre, duke falënderuar Policinë e Shtetit për gatishmërinë dhe profesionalizmin në këtë ndërhyrje.

Policia Kufitare e Vlorës rithekson angazhimin e saj të pandërprerë për garantimin e sigurisë së qytetarëve dhe vizitorëve, në çdo zonë të territorit, përfshirë edhe ato me akses të vështirë si Karaburuni.