Një çamçakëz misterioz, i cili mendohet se përmban përbërës që ndikojnë në përgjumjen e fëmijëve, është përhapur në disa shkolla 9-vjeçare në Tiranë, duke ngritur alarmin tek stafi pedagogjik dhe prindërit. Sinjalizimi i parë erdhi nga një mësuese, e cila informoi prindërit për këtë substancë të panjohur, që ngjalli dyshime mbi përmbajtjen e saj, përfshirë mundësinë e përbërësve narkotikë apo psikotropë sintetikë.

Policia e kryeqytetit ka nisur hetimet menjëherë pas publikimit të shqetësimit në rrjetet sociale dhe po verifikon rastet e raportuara. Ata kanë kontaktuar drejtuesit e shkollave dhe po kryejnë kontrolle të imtësishme për të zbuluar origjinën dhe përmbajtjen e substancës. Ndërkohë, kanë bërë thirrje për bashkëpunim nga qytetarët për të njoftuar në rast se identifikojnë ndonjë rast të tillë.

Në një reagim në Facebook, gazetari Mentor Kikia ka theksuar rëndësinë e kujdesit të prindërve, duke u bërë thirrje të mbajnë kontroll më të rreptë mbi fëmijët e tyre. Ai nënvizoi se përdorimi i kësaj substance sjell një gjendje përgjumjeje tek fëmijët dhe se nuk është e qartë nëse bëhet fjalë për një substancë narkotike apo jo. Kikia theksoi gjithashtu rëndësinë e bashkëpunimit mes shkollës, familjes dhe policisë për të luftuar këtë rrezik.

“Shkollat janë synuar gjithmonë nga shpërndarësit e substancave narkotike për të rekrutuar klientelë të re konsumatorësh. Bashkëpunimi mes institucioneve është i domosdoshëm për të ndalur përhapjen e këtyre substancave në mjedisin arsimor,” shkruan Kikia, duke i ftuar të gjithë të shpërndajnë informacionin për të rritur ndërgjegjësimin e prindërve.