Policia Rrugore e Tiranës ka gjobitur 6,689 drejtues automjetesh për shkelje të rregullave të qarkullimit rrugor, duke përfshirë shpejtësinë mbi normat e lejuara dhe parkimin në vende të ndaluara. Nëpërmjet një njoftimi për media, Policia bëri të ditur se ka filluar përdorimin e automjetit inteligjent “Scoud Speed” për monitorimin e akseve kryesore urbane dhe ndëshkimin e automjeteve që shkelin rregullat e qarkullimit.

Përmes këtij automjeti inteligjent, janë identifikuar shkelje të tjera, si përdorimi i celularit gjatë drejtimit të automjetit, mosvendosja e rripit të sigurimit, parakalimet e gabuara dhe automjetet që kanë masa administrative pa paguar. Gjatë javës së kaluar, shërbimet e Policisë Rrugore kanë monitoruar 24/7 dhe kanë ndëshkuar drejtuesit e automjeteve për këto shkelje.

Policia apelon për drejtuesit e automjeteve të respektojnë rregullat e qarkullimit dhe të mos parkojnë në vende ku mund të krijojnë pengesa për lëvizjen e lirë të automjeteve të tjera, duke theksuar se automjetet që do të konstatohet se bëjnë shkelje do të zhvendosen me karroatrec.