Policia spanjolle ka çmontuar një rrjet të madh të shpërndarjes së metamfetaminës të kartelit meksikan Sinaloa, duke sekuestruar 1.8 ton drogë ilegale. Policia Kombëtare e Spanjës e ka quajtur këtë konfiskim më të madhin ndonjëherë të metamfetaminave në vend. Gjatë operacionit, u arrestuan pesë persona: një shtetas meksikan, i identifikuar si udhëheqësi i grupit, tre persona spanjollë dhe një rumun. Policia bastisi gjithashtu gjashtë prona në rajonin lindor të Valencias.

Oficeri Antonio Martínez festoi çrrënjosjen e këtij grupi, për të cilin policia besonte se po përpiqej të krijonte një prezencë në Spanjë. Sipas Martínez, grupi përdorte shtëpi në zona të izoluara në rajonin e Valencias për të ruajtur ngarkesat e kontrabanduara të metamfetaminave, përpara se t’i transportonte ato në vende të tjera evropiane duke përdorur automjete me fund të rremë.

“Ne në Policinë Kombëtare menduam se kartelet meksikane nuk ishin krijuar në Spanjë. Por është e vërtetë që për shkak të presionit që ata kanë në pjesë të tjera të Evropës, mbi të gjitha kundër laboratorëve të tyre, po shohim se si ata po përpiqen të fillojnë operacionet ose të krijojnë laboratorë të paligjshëm në Spanjë për të prodhuar drogë,” tha Martínez.