Një politikan nga India, Baba Siddique, është qëlluar për vdekje në Mumbai të dielën, sipas raportimeve të BBC-së. Persona të armatosur hapën zjarr në drejtim të 66-vjeçarit në afërsi të zyrës së birit të tij, i cili është po ashtu politikan.

Policia ka arrestuar dy persona në lidhje me vrasjen. Siddique, një ish-ministër në nivel lokal, ishte një figurë e njohur politike në shtetin e Maharashtra-s, ku priten të mbahen zgjedhje muajin e ardhshëm. Vrasja e tij ka shkaktuar një reagim të fortë në të gjithë vendin dhe ka tronditur opinionin publik.

Siddique ishte i njohur për organizimin e festave luksoze dhe për lidhjet e tij të ngushta me yjet e Bollywoodit. Ngjarja ndodhi pavarësisht nivelit të lartë të sigurisë në qytet, për shkak të një festivali hindus që po zhvillohej në atë kohë.