Autoritetet polake kanë arrestuar një punonjës të Ministrisë së Mbrojtjes në Varshavë, nën dyshimet për spiunazh në favor të Rusisë. I arrestuari, një 60-vjeçar, dyshohet se ka bashkëpunuar me shërbimet sekrete ruse, ndërsa për dekada me radhë ka mbajtur poste administrative në departamentin e strategjisë dhe planifikimit të Ministrisë së Mbrojtjes, që nga vitet 1990.

Sipas autoriteteve polake, rasti konfirmon interesin e shtuar të inteligjencës ruse ndaj Polonisë, e cila konsiderohet një vend kyç në krahun lindor të NATO-s dhe një nyje strategjike për transportin e ndihmës ushtarake drejt Ukrainës.

Varshava ka akuzuar vazhdimisht Moskën për zhvillimin e një “lufte hibride” kundër Polonisë, që përfshin spiunazh, sabotime, shkelje të hapësirës ajrore me dronë, si dhe përdorimin e migracionit nga Bjellorusia si mjet presioni politik dhe sigurie.

Në këtë kuadër, autoritetet polake kujtojnë edhe një rast tjetër të bujshëm: një ish-ushtar polak 50-vjeçar u dënua me tre vjet e gjysmë burg për spiunazh në favor të Rusisë. Ai u arrestua në prill të vitit 2024, pasi u zbulua se kishte mbikëqyrur aeroportin e Rzeszow-it, në Poloninë lindore.

Aeroporti i Rzeszow-it, i ndodhur rreth 70 kilometra nga kufiri me Ukrainën, ka një rëndësi strategjike të veçantë, pasi shërben si pikë kryesore për transportin e ndihmës ushtarake perëndimore drejt Kievit. Po ashtu, ai përdoret shpesh nga presidenti ukrainas Volodymyr Zelensky, i cili gjatë udhëtimeve jashtë vendit kalon kufirin me tren dhe më pas udhëton me avion qeveritar nga ky aeroport.

Hetimet për rastin e fundit vijojnë, ndërsa autoritetet polake kanë paralajmëruar se do të intensifikojnë masat kundër aktiviteteve të spiunazhit dhe kërcënimeve hibride që vijnë nga Rusia.