Këngëtarja suedeze Zara Larsson ka zbuluar se ka humbur një marrëveshje të madhe prej 3 milionë dollarësh, rreth 2.7 milionë euro, pas një shaka për abortin që publikoi në TikTok dhe që shkaktoi reagime të forta në rrjet.

28-vjeçarja u përball me kritika të shumta online, por reagoi hapur duke sqaruar se nuk pendohet për atë që ka thënë dhe se bindjet e saj mbi çështjet shoqërore janë më të rëndësishme se çdo përfitim financiar. “Kohët e fundit, shakaja për abortin, e cila është shumë qesharake meqë ra fjala, më bëri të humbas një marrëveshje prej 3 milionë dollarësh”, tha artistja.

Zara Larsson theksoi se nuk do të punonte me kompani që nuk ndajnë të njëjtin këndvështrim mbi të drejtat e grave. “Nëse nuk jeni dakord me mendimin tim që gratë duhet të kenë akses në abort ose që mund të bëjmë një bisedë shakaje për këtë, atëherë nuk jemi të destinuar të jemi partnerë”, shtoi ajo.

Deklaratat e Larsson kanë ndezur një debat të gjerë në rrjet, duke rikthyer në vëmendje përplasjen mes bindjeve personale të artistëve dhe interesave komerciale të markave, ndërsa këngëtarja mbetet e vendosur në qëndrimet e saj, pavarësisht humbjes financiare.