Predikuesi i njohur amerikan,Pat Robertson, i cili drejton edhe programin televiziv mjaft popullor  “The 700 Club”, ka deklaruar se Zoti i ka treguar atij se çfarë do të ndodhë me zgjedhjet në SHBA.

Robertson, i cili një herë ka qenë dhe kandidat republikan për president, tha se Zoti i ka folur atij personalisht dhe i kishte thënë se Donald Trump do të jetë fituesi i zgjedhjeve, por kjo fitore gjithashtu do të jetë edhe fillimi i fundit të botës.

“Po lutesha të dielën dhe i thashë Zotit ‘të lutem më thuaj çfarë do të ndodhë’ dhe së pari dua të them pa dyshim se Trump do të fitojë këto zgjedhje” – parashikoi Robertson. “Kjo do të nisë një zinxhir tronditjesh.”

Ai shtoi se Kina dhe Koreja e Veriut do ta sfidojnë Trump me provokime të papara – dhe të paspecifikuara. “Trazira masive civile” do të shpërthejnë në të gjithë Amerikën, sipas tij si dhe: “do të ketë të paktën dy përpjekje për të vrarë Trump”.

Robertson shtoi: “Shtetet e Bashkuara do të jenë aq të preokupuara sa që një koalicion i vendeve kryesisht myslimane, përfshirë Iranin, do ta shohin këtë si një mundësi për të sulmuar Izraelin ndërsa aleati i tij amerikan është i dobët”.

Robertson thotë se sapo të përfundojë lufta në Lindjen e Mesme, me ndërhyrjen e vetë Zotit bota do të kalojë 5 vjet paqe.

“Për habinë e të gjithëve, vetë Zoti do të ndërmjetësojë në emër të Izraelit dhe do të mposhtë armiqtë e tij. Kjo fitore do të pasohet nga pesë vjet paqe në botë” – thotë ai, citojnë mediat amerikane.

Por pas kësaj, ai parashikon se një asteroid gjigand do të godasë Tokën duke rrezikuar gjithë jetën njerëzore.

Robertson parashikoi fitoren e Trumpit në vitim 2016, një sulm bërthamor në SHBA në vitin 2007, dhe një luftë masive përgjatë Lindjes së Mesme në vitin 2008.