Presidenti Bajram Begaj priti këtë të enjte në një vizitë zyrtare homologun gjerman Frank-Walter Steinmeier.

Gjatë konferencës së përbashkët për shtyp, presidenti vlerësoi ndihmën e dhënë në procesin e integrimit nga gjermania dhe u shpreh besimplotë se ndihma do të vijojë edhe gjatë hapjes së kapitujve gjatë procesit të anëtarësimit.

“Gjermania ka qenë një partnere shumë e besuar. Besoj shumë fort se ndihma që do të jap Gjermania në procesin e negociatave, në hapjen e kapitujve, do të ishte shumë i mirëpritur dhe shumë i dashuruar.

Axhenda e mbështetjes gjermane ka filluar 30-vite më parë. Ëndrra për të qenë pjesë e Evropës ka nisur në vitet ‘90 dhe nuk mund të jepet për bonus nga askush, por si pasojë e punës tonë. Kjo vizitë e presidentit gjerman sot në Tiranë është tregues i mbështetjes së Gjermanisë në rrugën Evropiane”, tha Begaj.

Nga ana tjetër presidenti gjerman vlerësoi progresin e arritur në procesin e integrimit në BE dhe inkurajoi Shqipërinë të vijojë në rrugën e nisur.

“Gjermania e ka parë përgjegjësinë e vet për të mbështetur reformën në drejtësi dhe për tu angazhuar në reformën territoriale.

Pas këtyre 30-viteve ne kemi marrëdhënie të shkëlqyera dhe dendësia e vizitave reciproke vitet e fundit tregon që interesi midis dy vendeve është rritur.

Vizita ime është një vizitë që vlerëson ato që keni arritur deri më tani dhe ju inkurajon të vazhdoni në rrugën e nisur”, tha Frank-Walter Steinmeier.

Gjithashtu ai u ndal dhe te Procesi Berlinit duke thënë: “Ne e përdorim Procesin e Berlinit për të përshpejtuar integrimin në Bashkimin Evropian, duke rritur fillimisht bashkëpunimin rajonal. Shpresoj që vendimet e miratuara të aplikohet sa më shpejt”.