Presidenti i Republikës, Bajram Begaj, priti sot në Tiranë një delegacion të Këshillit të Evropës, të kryesuar nga Sekretari i Përgjithshëm, Alain Berset. Gjatë takimit, Presidenti Begaj theksoi angazhimin dhe kontributin e Shqipërisë gjatë 30 viteve anëtarësim në KiE, duke shprehur mirënjohjen për mbështetjen që organizata ka dhënë në forcimin e shtetit ligjor, demokracisë dhe të drejtave të njeriut në vend.

Një temë e rëndësishme e bisedës ishte edhe integrimi i Kosovës në organizatat evropiane. Kreu i Shtetit deklaroi se Kosova është një realitet i pakthyeshëm dhe se duhet të jetë e përfaqësuar në Këshillin e Evropës dhe organizatat ndërkombëtare.

“Kosova është pjesë e Evropës dhe populli i saj meriton të jetë i integruar në strukturat evropiane. Ne duhet të ndërtojmë ura dhe jo mure, në mënyrë që të shmangim përsëritjen e konflikteve të së kaluarës në Ballkanin Perëndimor,” theksoi Presidenti Begaj.

Në takim u diskutua gjithashtu përgatitja e samitit të Komunitetit Politik Evropian, i cili do të mbahet në Tiranë më 16 maj 2025, një event me rëndësi për të ardhmen e bashkëpunimit evropian.