Presidenti i Republikës, Bajram Begaj, ka uruar Kosovën me rastin e 17-vjetorit të shpalljes së pavarësisë.

Përmes një postimi në rrjetet sociale, kreu i shtetit shqiptar shprehu nderimin e tij për mijëra burra dhe gra që sakrifikuan për lirinë dhe pavarësinë e Kosovës.

“Urime Ditën e Pavarësisë, Kosovë! Nderim përjetë mijëra burrave dhe grave që sakrifikuan për lirinë e pavarësinë! Faleminderit të gjithë miqve e aleatëve tanë që janë krah teje! Gëzuar!”, shkroi Begaj në Facebook.

Sot, Kosova numëron rreth 117 njohje ndërkombëtare dhe është pjesë e disa organizatave të rëndësishme si Banka Botërore, Fondi Monetar Ndërkombëtar, BERZH, Komiteti Olimpik dhe federatat ndërkombëtare të futbollit UEFA dhe FIFA. Megjithatë, ajo ende nuk ka siguruar anëtarësimin në Organizatën e Kombeve të Bashkuara, Bashkimin Evropian dhe Këshillin e Evropës.

Pavarësisht sfidave diplomatike, Kosova feston sot 17 vite si shtet i pavarur, duke vijuar përpjekjet për forcimin e pozitës së saj në arenën ndërkombëtare.