Presidenti i Hungarisë, Tamas Sulyok, i ka dërguar një letër-urimi Presidentes së Kosovës, Vjosa Osmani, me rastin e 17-vjetorit të Pavarësisë së Kosovës.

Në letrën e tij, të publikuar nga Presidenca e Kosovës, Sulyok ka ftuar Osmanin për një vizitë zyrtare në Hungari, duke theksuar mbështetjen e vazhdueshme të Hungarisë për zhvillimin dhe integrimin e Ballkanit Perëndimor.

Presidenti hungarez ka vlerësuar reformat politike, ekonomike dhe sociale që Kosova po ndërmerr në rrugën drejt anëtarësimit në Bashkimin Evropian, duke shprehur besimin se Kosova do t’i përmbyllë me sukses hapat e nevojshëm për të fituar statusin e kandidatit për BE.

“Jemi të bindur se reformat e nevojshme për arritjen e statusit të kandidatit për anëtarësim do të përmbyllen me sukses sa më shpejt të jetë e mundur”, ka theksuar ai, duke riafirmuar angazhimin e Hungarisë për ta mbështetur këtë proces.

Ky mesazh vjen si një sinjal i rëndësishëm i mbështetjes së Hungarisë për perspektivën evropiane të Kosovës, si dhe forcimit të marrëdhënieve dypalëshe mes dy vendeve.