KAS pritet të japë sot një vendim në lidhje me pretendimet e Hoxhës, ku përveç dyshimeve për votimin elektronik, janë dorëzuar edhe prova, ku operatorët ndihmojnë apo asistojnë qytetarët gjatë procesit të votimit, gjë që është e ndaluar.

Hoxha u shpreh dhe për vendimin e KAS për të mos pranuar ekspertë ndërkombëtar për testimin e pajisjeve, ku tha se ai do të paguante vetë koston, nëse do të lindte nevoja.

“Unë nuk dua të paragjykoj vendimin që do të jepet, duke marrë shkas nga dita e djeshme që KAS nuk pranoi kërkesën tonë për ekspertë të pavarur, për auditimin e pajisjeve për votimin elektronik, ka anomali statistikore të paprecedentë.

Vetëm në këtë mënyrë ne do të kishim çuar deri në fund barrën e provës, ne jemi të bindur që ka pasur një paraprogramim pëmes pajisjeve elektronike. Kërkesa u rrëzua dje , provat KAS i ka të bollshme, të mjaftueshme. Asnjë kërkesë e jona nuk është plotësuar, nga 10 kërkesa, për të bërë transparencën e procesit.

Në vetëm 4 qendra votimi, ka 202 herë që votojnë operatorët, duhet llogaritur përqindja e ndikimit të tyre në të gjithë rezultatin. Në 14 Maj nuk ka pasur votim të lirë dhe të fshehtë. Ka shkelje të Kushtetutës, që prevalon mbi çdo kod tjetër zgjedhor. Ne jemi të përgatitur për të faktuar para gjithë votuesve që 14 Maji ka qenë një ditë e krimit zgjedhor”, u shpreh Hoxha.