Pas shpërthimit në kanalin e Ibër-Lepencit në komunën e Zubin Potokut, riparimi i dëmeve vijon, ndërsa një pjesë e veriut të Kosovës ende përballet me vështirësi në furnizimin me ujë. Autoritetet kanë marrë masa të menjëhershme për të siguruar ujë të pijshëm përmes autoboteve për banorët e prekur.

Komuna e Mitrovicës së Veriut njoftoi se furnizimi me cisterna uji do të vijojë edhe gjatë ditës së sotme për të përballuar nevojat bazë të qytetarëve. Në të njëjtën kohë, Korporata Energjetike e Shqipërisë (KESH) ka nisur furnizimin me energji elektrike për Korporatën Energjetike të Kosovës (KEK), me qëllim lehtësimin e krizës energjetike të krijuar nga situata e rënduar në vend.

Policia e Kosovës ka arrestuar tetë persona të dyshuar për lidhje me shpërthimin, duke sekuestruar një arsenal të madh armësh në zonën veriore. Në një konferencë për shtyp, Ministri i Brendshëm Xhelal Sveçla deklaroi se sulmi ishte i organizuar nga ato që ai i cilësoi si “organizata terroriste.”

Kryeministri Albin Kurti, i cili më herët e cilësoi aktin si terrorist dhe të dirigjuar nga Serbia, e ka dënuar ashpër sulmin. Ai dhe autoritetet tjera të Kosovës kanë theksuar se zbardhja e ngjarjes dhe vënia para drejtësisë e përgjegjësve mbetet një prioritet kryesor.

Ky incident ka rritur tensionet në rajon, duke tërhequr vëmendjen e ndërkombëtarëve që kanë dënuar sulmin dhe kanë bërë thirrje për ruajtjen e stabilitetit në Kosovë dhe rajon.