Prokuroria e Posaçme ka dërguar në laborator për ekspertim një kasetë që sipas familjarëve të të ndjerit Aleks Nika, tregon se vrasjet e protestuesve në 21 janar 2011 janë kryer me urdhër. Kaseta përmban 34 minuta audio-regjistrim të komunikimeve të drejtuesve të Gardës gjatë ngjarjes, ku supozohet se dëgjohet Ndrea Prendi, komandanti i atëhershëm i Gardës, duke dhënë urdhër për hapjen e zjarrit luftarak mbi protestuesit, jo më plumba manovër.
Dyshohet se regjistrimi është bërë nga një person me akses në një kanal komunikimi të sigurt që përdorej nga drejtuesit e lartë të Gardës, i cili ka regjistruar komandat dhe urdhrat në momentin e ngjarjes. Ky material konsiderohet një provë e re në procesin hetimor.
Përveç kësaj, disa ditë më parë, janë paraqitur në SPAK ish-drejtori i Përgjithshëm i Policisë së Shtetit, Hysni Burgaj, dhe zëvendësi i tij, Agron Kuliçaj. Të dy janë akuzuar për zbatimin e urdhrave të arrestit të prokurorisë 18 ditë me vonesë për Ndrea Prendin dhe pesë gardistët e tjerë, duke dëmtuar rëndë hetimin e ngjarjes.
Prokuroria e Posaçme nisi hetimet për ngjarjen e 21 janarit 2011 pas një urdhri nga Gjykata e Strasburgut, e cila e kërkoi zbardhjen e kallëzimit të bërë nga Rajmonda Nika, bashkëshortja e Aleks Nikës. Gjykata e Strasburgut e cilësoi ngjarjen si krim shtetëror që kërkon të zbardhet.
