Prokuroria pranë Gjykatës së Shkallës së Parë Fier ka përfunduar hetimet dhe ka dërguar për gjykim shtetasit K.K., L.K. dhe G.K. për veprën penale “Goditje për shkak të detyrës” në bashkëpunim, parashikuar nga nenet 237/3 dhe 25 të Kodit Penal.

Hetimet, të kryera në bashkëpunim me policinë gjyqësore, tregojnë se më 15 prill 2025, punonjësit e policisë pranë Forcës Operacionale të Drejtorisë së Përgjithshme dhe një oficer i Byrosë Kombëtare të Hetimit kishin shkuar në Fier për kryerjen e veprimeve hetimore. Gjatë lëvizjeve në qytet, ata u ndaluan nga tre të pandehurit, të cilët, pavarësisht prezantimit të policëve si punonjës të ligjshëm, ushtruan dhunë fizike ndaj tyre për shkak të detyrës që po kryenin.

Të tre të pandehurit u arrestuan në flagrancë dhe gjatë hetimeve u morën masat e sigurisë “arrest në burg” dhe “arrest në shtëpi”.

Prokuroria Fier thekson se do të vazhdojë të angazhohet për të mbrojtur autoritetin shtetëror dhe sigurinë e personave që kryejnë detyrë publike, duke garantuar zbatimin e ligjit ndaj veprimeve kriminale.