Dy personazhe të njohur në rrjetet sociale dhe të përmendur shpesh në mediat shqiptare, Genard Hajdini dhe motra e tij Sonida Hajdini, ndodhen aktualisht të shtruar në spitalin psikiatrik në Tiranë, ndërsa Prokuroria ka nisur një hetim pas publikimit të një videoje shqetësuese në Instagram.

Hetimi u hap pas rekomandimit të mjekëve dhe ndërhyrjes së strukturave sociale, pas publikimit nga Genard Hajdini të pamjeve të konsideruara të papërshtatshme me motrën e tij. Videoja nxiti reagimin e menjëhershëm të institucioneve, të cilat kryen vlerësimin e gjendjes shëndetësore të Sonida Hajdinit.

Sipas njoftimit zyrtar të Ministrisë së Shëndetësisë, gjatë intervistimit Sonida Hajdini ka deklaruar se videoja ishte publikuar me qëllim që të bëhej virale dhe se, sipas saj, nuk kishte elementë dhune apo qëllime dashakeqësie. Videoja është fshirë nga vetë Genard Hajdini pas urdhrit të policisë.

Ministria bën me dije se vëlla e motër kishin qenë edhe dy javë më parë në Spitalin e Shëndetit Mendor në Tiranë, ku kishin marrë trajtim mjekësor dhe medikamente, ndërsa ishte caktuar edhe trajtim ambulator përmes një kujdestareje të vendosur nga të afërmit e tyre.

Aktualisht, të dy janë shtruar për një shërbim më të specializuar mjekësor dhe do të jenë nën monitorim të vazhdueshëm nga autoritetet. Materialet janë referuar në Prokurori, për shkak të dyshimeve për konsumimin e veprës penale të shfrytëzimit të një personi me aftësi ndryshe.

Ministria e Shëndetësisë njofton se strukturat e shërbimit social, në bashkëpunim me institucionet përkatëse, do të hartojnë një plan masash për monitorimin dhe mbështetjen e mëtejshme të dy personave.