Protestuesit e opozitës janë zhvendosur nga Kryeministria drejt Drejtorisë së Policisë pranë Myslym Shyrit, ku situata është tensionuar më tej. Gjatë marshimit, disa protestues i kanë vënë flakën një stacioni autobusi, dhe pamjet tregojnë fasadën e stacionit të përfshirë nga zjarri.

Protesta, e cila filloi përpara Kryeministrisë, u përshkallëzua shpejt me përplasje midis protestuesve dhe policisë. Militantët e opozitës, nën drejtimin e Flamur Nokës dhe Gazment Bardhit, kanë hedhur lëndë piroteknike dhe molotovë drejt forcave të sigurisë. Pjesa më e madhe e protestuesve mbajnë në duar pankarta me foto të deputetit Ervin Salianji, i cili, sipas tyre, është burgosur padrejtësisht për arsye politike. Ndër mesazhet e shkruara në pankarta janë: “Heshtja barazim me burg, fjala barazim me liri,” dhe “E vërteta nuk prangoset.”

Protesta kombëtare e thirrur nga opozita ka nisur me tensione dhe akte dhune, që synojnë të shprehin revoltën kundër qeverisë dhe drejtësisë së përdorur politikisht.