Një grup militantësh mbështetës të Rithemelimit dhe Partisë së Lirisë protestuan sërish para bashkisë së Tiranës, duke kërkuar heqjen e gardhit metalik. Në udhëheqje të tyre ishin përfaqësues të Rithemelimit dhe Partisë së Lirisë, si Flamur Noka, bashkëpunëtor i ngushtë i Sali Berishës, dhe Sekretari i Përgjithshëm i Partisë së Lirisë, Tedi Blushi. Konfrontimi me policinë u përshkallëzua, dhe militantët u përplasën me forcën policore.

Në një moment, disa protestues hodhën molotovë dhe tymuese drejt derës së bashkisë, duke dëmtuar godinën. Përforcimet policore tentuan të shuanin flakët, por përpjekja dështoi.

Protesta e opozitës u organizua pas arrestimit të disa drejtorëve dhe ish-drejtorëve të bashkisë së Tiranës për dyshime për korrupsion. Me megafon, Tedi Blushi, këshilltar bashkiak i Partisë së Lirisë, sulmoi SPAK-un, duke akuzuar prokurorinë e posaçme për bashkëpunim me kryebashkiakun Erion Veliaj. Blushi kërcënoi se nëse kryebashkiaku vazhdon të mbrohet nga SPAK-u, ata do të hyjnë në zyrat e tij për ta arrestuar, duke bërë thirrje për largimin e tij dhe të kryeministrit Edi Rama.

Ndërkohë, forca të shumta policie janë vendosur para bashkisë për të mbajtur qetësinë dhe për të parandaluar përplasjet e mëtejshme.