Partia Demokratike ka thirrur sot një protestë përpara Kryeministrisë, e cila ishte njoftuar të fillonte në orën 18:00. Selia blu nuk ka dhënë shumë detaje për organizimin e protestës, por ka deklaruar se do të ketë akte të mosbindjes civile. Megjithëse numri i protestuesve ishte modest, protesta ka nisur me akte agresive. Me të mbërritur para Kryeministrisë, protestuesit kanë sulmuar policinë me lëndë piroteknike dhe kanë hedhur molotov drejt ndërtesës së Kryeministrisë.
Ora 19:51 – Molotov drejt Bashkisë së Tiranës, përleshje me policinë
Protestuesit e opozitës kanë hedhur molotov edhe drejt Bashkisë së Tiranës, duke rrezikuar jetën e efektivëve të policisë. Një prej tyre u ndodh mes flakëve pas shpërthimit të një molotovi. Policia ka përdorur ujë dhe gaz lotsjellës për të shpërndarë turmën.
Ora 19:45 – Molotov drejt Ministrisë së Brendshme
Situata u tensionua më tej kur protestuesit hodhën molotov drejt Ministrisë së Brendshme, duke rrezikuar përsëri jetët e efektivëve të pranishëm.
Ora 19:38 – Dhunë ndaj selisë së Partisë Socialiste
Protestuesit e opozitës kanë hedhur molotov drejt selisë së Partisë Socialiste, duke shkaktuar dhunë dhe përleshje me policinë. Ky është një akt i përsëritur, dy vjet pasi protestuesit dogjën selinë e Partisë Demokratike.
Ora 19:34 – Bllokim i rrugëve dhe makinat në mes të protestës
Përveç sulmeve me molotov, protestuesit kanë bllokuar rrugët duke përplasur fizikisht me efektivët e policisë. Situata në rrugët e Tiranës vazhdon të jetë e tensionuar, me aktet e dhunës që përshkallëzohen ndërsa protesta vazhdon.
