Në të gjithë Serbinë po mbahet një grevë e përgjithshme, të premten, e shpallur nga studentët që janë në protestë për më shumë se dy muaj. Ata kërkojnë përgjegjësi penale dhe politike për vdekjen e 15 personave nga shembja e një strehese në Stacionin Hekurudhor në Novi Sad më 1 nëntor.

Studentët janë bashkuar me qytetarët në një aksion masiv që ka përfshirë bllokimin e fakulteteve dhe kërkimin e ndëshkimit të autorëve të kësaj tragjedie. Gjatë protestës, mediat raportuan se një vajzë u lëndua pas një incidenti në Novi Beograd, kur një makinë goditi një grup studentësh dhe qytetarësh. Ajo u dërgua menjëherë në një qendër emergjence për trajtim mjekësor.

Ministria e Punëve të Brendshme të Serbisë njoftoi se shoferja që goditi vajzën u arrestua dhe është dërguar në paraburgim për 48 orë. Shoferja, M.S., 25 vjeçe, po dyshohet për veprën penale “vrasje e rëndë në tentativë”, pasi sipas autoriteteve, ajo shkaktoi aksidentin gjatë protestës.

Greva e përgjithshme, ose siç quhet ndryshe “mosbindja e përgjithshme civile”, është një formë e rezistencës që nënkupton ndërprerjen totale të aktiviteteve të përditshme. Kjo përfshin ndërprerjen e punës, bllokimin e shërbimeve të përditshme si dyqanet, restorantet, kinematë dhe teatrot.