Meksika është përfshirë nga protesta të mëdha kombëtare, ku mijëra njerëz, mes tyre familjarë të personave të zhdukur dhe aktivistë të të drejtave të njeriut, kanë kërkuar veprim urgjent nga autoritetet për t’i dhënë fund fenomenit dramatik të zhdukjeve të detyruara.

Demonstratat u zhvilluan në Meksiko Siti, Guadalajara, Córdoba dhe shumë qytete të tjera, duke reflektuar përmasat e thella të krizës.

Sipas të dhënave zyrtare, mbi 130 mijë persona rezultojnë të zhdukur në Meksikë, shumica pas vitit 2007, kur ish-presidenti Felipe Calderón nisi “luftën kundër drogës”. Shumë prej tyre dyshohet se janë rekrutuar me forcë nga kartelët, janë vrarë për shkak të rezistencës ose janë zhdukur në mënyrë të dhunshme. Organizatat kriminale, por edhe forcat e sigurisë, akuzohen për përfshirje në këto krime.

Pamjet nga protestat treguan familjarë të dëshpëruar, që mbanin pankarta me fytyrat e të dashurve të zhdukur, duke kërkuar drejtësi dhe duke i bërë apel presidentes Claudia Sheinbaum të intensifikojë kërkimet. Në Meksiko Siti, marshimi bllokoi bulevardet kryesore të kryeqytetit, duke pasqyruar dhimbjen kolektive dhe pakënaqësinë ndaj institucioneve.

Shumë familje janë organizuar në grupe kërkimi të njohura si “buscadores”, të cilat shëtisin shkretëtirat dhe fshatrat duke ndjekur çdo informacion mbi vendndodhjen e varreve masive.

🔴 130 mijë të zhdukur
🔴 Protesta në dhjetëra qytete
🔴 Apel autoriteteve për veprim urgjent