Mijëra protestues kanë marshuar të shtunën në Beograd për të kundërshtuar projektin e planifikuar për mihjen e litiumit nga kompania australiane Rio Tinto në Serbi. Protesta është organizuar nga Aleanca e Organizatave për Ambientin e Serbisë dhe ka për qëllim të ndalojë hapjen e minierave në luginën e lumit Jadar, në perëndim të Serbisë.

Zllatko Kokanoviq nga Asociacioni “Nuk e japim Jadarin” ka thirrur protestuesit të bllokojnë urën Gazella dhe dy stacione hekurudhore, duke theksuar se protestat duhet të mbeten paqësore. Ai ka kërkuar që të mos ketë kthim mbrapa dhe të mbrohet Serbia nga ky projekt.

Protestuesit, të cilët mbajnë pankarta që shprehin kundërshtinë ndaj Rio Tinto dhe mihjes së litiumit, janë të shqetësuar për ndikimin mjedisor dhe shëndetësor të projektit. Svetllana Bojkoviq dhe profesoresha Dragana Gjorgjeviq kanë theksuar se dëmet e mundshme janë të pariparueshme dhe se Serbia nuk duhet të lejojë hapjen e minierës.

Protestat janë një përgjigje ndaj vendimit të Gjykatës Kushtetuese të Serbisë për të hequr pezullimin e projektit Jadar, i cili ishte ndaluar më parë për shkak të shqetësimeve të mëdha mjedisore. Presidenti serb, Aleksandar Vuçiq, ka shprehur mbështetje për projektin, duke thënë se miniera duhet të nisë në vitin 2026 nëse garantohet mbrojtja e ambientit dhe jetës së njerëzve.

Ministri i Shëndetësisë, Zoran Lonçar, ka prezantuar një ekip ekspertësh që do të vlerësojnë ndikimin shëndetësor të projektit. Megjithatë, ndonëse Rio Tinto ka siguruar garanci për përputhshmërinë me standardet mjedisore, shumë ekspertë vendorë dhe ndërkombëtarë janë të shqetësuar për ndotjen e mundshme të ujit dhe tokës si pasojë e eksploatimit të litiumit.

Protestat në Beograd janë pjesë e një lëvizjeje më të gjerë që ka nisur prej fundit të qershorit dhe kanë për qëllim të ndalojnë zhvillimin e këtij projekti që ata e konsiderojnë të dëmshëm për ambientin dhe për mbijetesën e Serbisë.