Kanë muaj që presin e pyesin për një datë të mundshme për zhvillimin e provimit të shtetit në mësuesi, por vetëm tani është dhënë drita jeshile për mësuesit e rinj, të cilët duan të fitojnë licencën për të konkurruar mandej në provimin për punës “Mësues për Shqipërinë”.

Në një letër që Ministria e Arsimit ua ka nisur drejtorive arsimore rajonale e zyrave arsimore kërkohet marrja e masave për regjistrimin dhe dorëzimin e listës së emrave që duan të testohen në sezonin që do të mbahet në muajin e ardhshëm. “Provimet e shtetit për profesionin e rregulluar të mësuesit do të zhvillohen gjatë muajit prill 2022, pranë Qendrës së Shërbimeve Arsimore, sipas kalendarit të hartuar nga ky institucion”, citohet në shkresën përcjellëse, në të cilën nënvizohet se deri në gjysmë të muajit mars, pra, në datë 15, zyrat arsimore të dorëzojnë listën e kandidatëve bashkë me të dhënat e tyre.

Ato i përcillen QSHA-së, e cila pasi harton kalendarin me datat bazuar në atë database, harton dhe bën publike listën bashkë me datën dhe orën specifike të të testuarve. Si rregull, testimet për profesionet e rregulluara të mësuesit e mjekëve mbahen dy herë në vit, parimisht në korrik e dhjetor, por rendi është prishur prej kohësh tanimë, çka ka penalizuar të rinjtë në kërkimin e një pune me zgjatjen në kohë të procesit.

MAS u bën me dije zyrave vendore se janë përgjegjëse për saktësinë e të dhënave në filtrimin e dosjeve që plotësojnë ose jo kushtet për t’u futur në provim. Sakaq, nuk mbajnë asnjë përgjegjësi për mosrespektimin e afateve në zhvillimin e testimeve dy herë në vit, dhjetor e korrik.