Pas deklaratës së Kreu të Grupit Parlamentar të PS, Taulant Balla, se partia demokratike është tërhequr nga procesi i sjelljes së kandidaturave, ka reaguar grupi i PD.
Sekretari i Grupit të PD Arbi Agalliu ka publikuar në rrjetet sociale një pjesë nga mbledhja për Presidentin e ri dhe deklaron ka qenë PS ajo e cila u tërhoq nga pakti pasi pa emrat e kandidatëve për President.
Agalliu shkruan se Taulant Balla u tërhoq nga dokumenti i PD, me të cilin ai vetë ra dakord para syve të kamerave dhe shqiptarëve.
Postimi:
“Pacta sunt servanda”. Është ky minimumi i seriozitetit që procesi i zgjedhjes së Presidentit meriton të ketë.
Taulant Balla u tërhoq nga dokumenti i PD, me të cilin ai vetë ra dakord para syve të kamerave dhe shqiptarëve. Mesa duket, pasi mësuan kandidatët e propozuar nga deputetët e PD, njerëz seriozë e me integritet, që nderojnë Shqipërinë, u tërhoq pa shpjegim dhe bën sikur nuk kupton.
PD është për një President për të gjithë shqiptarët dhe që nderon Shqipërinë. PS kërkon President vetëm për socialistët për ta patur në xhep Rama. Këtë të dytën mund ta bëjë, me mandatet e vjedhura dhe deputetët non grata, por jo me PD.
