Partia Socialiste ka zhvilluar sot në Parkun Olimpik të Tiranës takimin përmbyllës të fushatës së 11 majit, nën një atmosferë festive dhe europiane. “Ylli i Bashkimit Europian” ishte vendosur si pjesë e dekorit, duke përforcuar mesazhin kryesor të socialistëve: Integrimi në Bashkimin Europian.

Takimi nisi me performancat e disa të rinjve, ndërsa këngëtarja Elvana Gjata ndezi atmosferën me një interpretim të veçantë. Në skenë, flamujt e Shqipërisë dhe Bashkimit Europian ishin të pranishëm në të gjitha detajet vizuale, në vazhdën e stilit të kësaj fushate, ku PS ka vënë theksin te rruga europiane e vendit.

Edi Rama, i shoqëruar nga bashkëshortja e tij Linda Rama, u shfaq në skenë për të dhënë mesazhin përmbyllës të fushatës. Pritet që ai të mbajë një fjalim me theks të fortë në reformat e deritanishme dhe projektin europian të qeverisë.