Në mitingun përmbyllës të Partisë Demokratike në Tiranë, drejtuesi i fushatës, Chris LaCivita, mbajti një fjalim të fuqishëm, duke e cilësuar 11 majin si një moment historik për shqiptarët dhe një mundësi reale për ndryshim.

“Ju keni tani një shans historik”, u shpreh LaCivita, “për t’i treguar botës se shqiptarët e refuzojnë politikën e së kaluarës, nuk frikësohen dhe nuk reshtin së luftuari për familjet e tyre”. Ai i bëri thirrje qytetarëve të dalin masivisht në votime, duke marrë me vete familjarë, miq e fqinj, për të, siç tha, “larguar Edi Ramën”.

LaCivita vlerësoi Sali Berishën si njeriun që mund t’i japë fund korrupsionit dhe të ringrejë ekonominë:
“Në Shqipërinë e re me Berishën, ju do keni një burrë që shpëton jetë. Pse të mos vendosni besimin tuaj në një mjek që do të shpëtojë të ardhmen e Shqipërisë?” – u shpreh ai, duke e prezantuar Berishën si figurë të së ardhmes dhe jo të së shkuarës.

Ai theksoi se zgjedhjet e 11 majit janë me rëndësi ndërkombëtare, duke deklaruar:
“E gjithë bota i ka sytë nga këto zgjedhje” dhe përfundoi me mesazhin: “Zoti e bekoftë Shqipërinë!”