Ndërsa inspektoi punimet për asfaltimin e ‘Shëtitores së Palmave’ në Lushnje, kreu i grupit të PS, Taulant Balla iu përgjigj interesit të gazetarëve lidhur me zgjedhjet e pjesshmë vendore të 6 marsit, dhe kandidatit që do i besojë PS në këtë proces.
Balla tha se nuk po presin emrin e opozitës, për të publikuar kandidaturën e tyre për bashkinë e Lushnjes, ndërsa shtoi se e ka pasur një numër të madh kandidatësh me vlera dhe është duke u diskutuar se kujt do i besohet “vijimi i këtyre projekteve për Lushnjen”.
“Nuk ka asnjë lidhje, nuk jemi në garë me opozitën do qeverisim bashkë, jo vetëm në këtë pjesë të mbetur të mandatit, por ne do të vazhdojmë të qeverisim edhe përtej mandatit që nis në 2023. Ajo që kemi bërë është diçka mëse normale, kur ke një numër të madh vlerash kandidatësh do të duhet të konsultohesh me të gjithë, për të kuptuar kush është personi që do i besojmë të çojë para këto projekte.
Po ajo që është e rëndësishme PS e Lushnjes janë të gjithë të bashkuar në funksion të një fitore, që do të jetë ndër më të mëdhatë që ka hasur PS.”- u shpreh Balla.
