Partia Socialiste ka përfunduar zyrtarizimin e kandidatëve për zgjedhjet e pjesshme lokale të 9 Nëntorit, që do të mbahen në Tepelenë, Vlorë, Mat, Berat, Cërrik dhe Tiranë. Ja profil i secilit kandidat:
• Tepelenë – Gramoz Sako
Ish-Komandant i Përgjithshëm i Gardës së Republikës (2013–2024), Sako ka një karrierë të gjatë ushtarake. Ai ka zyrtarizuar vendbanimin në Tepelenë, duke u regjistruar në Gjendjen Civile, dhe pritet të sfidojë kandidatët e pavarur të mbështetur nga PD. Vëllai i tij, Artan Sako, zotëron kompaninë “2T”, e njohur për tendera publikë.
• Vlorë – Brunilda Mersini
Deputete aktuale dhe mjeke, Mersini ka drejtuar më parë Spitalin e Vlorës dhe ka punuar si pedagoge. Ajo pritet të japë dorëheqjen nga Kuvendi për t’u përqendruar në garën lokale.
• Mat – Altin Bojni
Aktualisht kryetar i Këshillit Bashkiak të Matit dhe drejtor i Njësisë vendore të Kujdesit Shëndetësor. Ka shërbyer më parë si drejtor i filialit të Postës në Mat.
• Berat – Ervin Ceca
Kryetar i komanduar në detyrë i bashkisë, më parë nënkryetar dhe kryetar i Këshillit Bashkiak të Beratit.
• Cërrik – Florenc Doka
Edhe ai kryetar i komanduar në detyrë, Doka ka menaxhuar detyrat kryesore të administratës lokale para emërimit si kandidat për zgjedhjet e pjesshme.
• Tiranë – Ogerta Manastirliu
Ish-ministre dhe figurë e njohur politike, Manastirliu do të sfidojë aktorin dhe kandidatin e PD-së, Florjan Binaj, në një garë që pritet të jetë shumë e ndjekur.
Zgjedhjet e pjesshme janë thirrur për bashkitë ku kryebashkiakët dhanë dorëheqjen për t’u zgjedhur deputetë ose për t’u emëruar në poste qeveritare.
