Izraeli ka deportuar aktivisten e njohur për klimën, Greta Thunberg, pasi ushtria izraelite ndaloi anijen ku ajo ndodhej, pjesë e Flotiljes së Lirisë, e cila synonte të dërgonte ndihma humanitare në Rripin e Gazës. Lajmi u konfirmua nga Ministria e Jashtme izraelite, e cila njoftoi se Thunberg është dërguar fillimisht në Francë dhe më pas është nisur për në vendlindjen e saj, Suedi.

Në një postim në platformën X, ministria publikoi një foto të Thunberg të ulur në aeroplan, duke theksuar deportimin e saj, pavarësisht se aktivistja ka zgjedhur ndër vite të shmangë udhëtimet ajrore për arsye mjedisore.

Duke folur pas mbërritjes në aeroportin Charles de Gaulle në Paris, Thunberg e përshkroi ndalimin si një situatë “kaotike dhe të pasigurt”. Ajo tha se, megjithatë, “kushtet tona nuk janë asgjë në krahasim me atë që po kalojnë njerëzit në Gaza”.

“Ne ishim shumë të vetëdijshëm për rreziqet e këtij misioni,” tha Thunberg. “Qëllimi ynë ishte të shkonim në Gaza dhe të shpërndanim ndihmë.”

Aktivistja shtoi se pjesëtarët e flotiljes u mbajtën të ndarë nga njëri-tjetri dhe disa prej tyre patën vështirësi në komunikimin me avokatët. E pyetur pse zgjodhi të deportohej, ajo u përgjigj: “Pse do të doja të qëndroja në një burg izraelit më shumë seç duhej?”

Thunberg theksoi se aktivistët do të vazhdojnë përpjekjet për të dërguar ndihmë në Gaza dhe bëri thirrje për veprim ndërkombëtar:
“Qeveritë duhet të mobilizohen jo vetëm për të siguruar hyrjen e ndihmës humanitare në Gaza, por, më e rëndësishmja, për t’i dhënë fund pushtimit dhe shtypjes sistemike që po përjetojnë palestinezët çdo ditë.”