Policia ka zbardhur konfliktin me armë që ndodhi një ditë më parë në një parkim pranë Rinasit, ku dy të rinj mbetën të plagosur pas një sherri të çastit.

Në përfundim të hetimeve paraprake, është arrestuar Josif Mena, pronari i automjetit me të cilin autorët u larguan nga vendngjarja. Ndërkohë, personi që qëlloi me armë zjarri vijon të jetë në kërkim, dhe policia është vënë në ndjekje të tij.

Gjatë kontrollit të automjetit të përdorur në ngjarje, u gjet një gëzhojë, ndërsa në banesën e njërit prej të dyshuarve u sekuestrua arma e zjarrit që dyshohet se u përdor në konflikt.

Burime nga grupi hetimor bëjnë me dije se sherri ka nisur për arsye banale, pas një përplasjeje verbale me fjalët: “Pse më pe?” dhe “Pse parkon aty?”.

Nga ngjarja mbetën të plagosur Fabjo Arifaj, i cili u qëllua në këmbë me armë zjarri, dhe Grisjan Latifaj, i cili u godit me sende të forta.

Policia ka sekuestruar armën, automjetin dhe provat e tjera materiale, ndërsa hetimet po vijojnë për identifikimin dhe kapjen e autorit të armatosur, si dhe për zbardhjen e plotë të rrethanave të incidentit.