Pas njoftimit të papritur nga kompania energjetike austriake OMV se grupi energjetik rus Gazprom po pezullonte furnizimin me gaz natyror drejt Austrisë, presidentja e Komisionit Evropian, Ursula von der Leyen, reagoi duke e dënuar veprimin si një përpjekje për shantazh nga ana e Rusisë.

“Edhe një herë, Putin po përdor energjinë si armë,” deklaroi von der Leyen përmes një postimi në Platformën X, duke nënvizuar synimin e presidentit rus për të ushtruar presion mbi Austrinë dhe tërë Evropën duke shkurtuar furnizimet me gaz. Kjo lëvizje e fundit tregon një rikthim në strategjinë e përdorimit të burimeve natyrore si mjet politik dhe ekonomik në konfliktin midis Rusisë dhe Perëndimit.

Von der Leyen siguroi qytetarët e BE-së se Bashkimi Evropian është përgatitur për sfida të tilla dhe se ka në plan veprime të qarta për të përballuar përpjekjet e Kremlinit për destabilizim. “Ne jemi të përgatitur për këtë dhe gati për dimër. Magazinimi i gazit në të gjithë BE-në është plot,” theksoi ajo.

Kryetarja e Komisionit Evropian gjithashtu u ndal të theksojë solidaritetin midis shteteve anëtare, duke theksuar se Evropa do të qëndrojë e bashkuar përballë sfidave të përbashkëta. “I vura në dukje kancelarit austriak Karl Neuhammer se Evropa është e bashkuar në mbështetjen e Austrisë,” përfundoi von der Leyen.

Ky akt i Gazpromit, në vazhdën e tensioneve gjeopolitike, forcon bindjen e Evropës për të rritur pavarësinë energjetike dhe për të investuar në burime të ripërtëritshme, duke dobësuar gjithnjë e më shumë ndikimin e Rusisë në tregjet energjetike të kontinentit.