Qeveria Italiane ka miratuar këtë të premte një dekret të ri, i cili i lejon shtetit italian të transferojë emigrantët e paligjshëm nga qendrat e ndalimit në Itali drejt qendrave pritëse në Gjadër dhe Shëngjin, Shqipëri.

Sipas dekretit, emigrantët të cilëve u është refuzuar azili mund të dërgohen në qendrën e Gjadrit, ku mund të qëndrojnë deri në 18 muaj, në pritje të riatdhesimit. Megjithatë, dëbimi përfundimtar do të realizohet nga territori italian, që do të thotë se pas qëndrimit në Shqipëri, emigrantët do të kthehen sërish në Itali për t’u riatdhesuar.

Kostot dhe sfidat

Vendimi ka shkaktuar shqetësime në Itali, veçanërisht për kostot e administrimit, pasi çdo emigrant duhet të shoqërohet nga dy oficerë policie gjatë transferimeve midis dy vendeve.

Ministri i Brendshëm italian, Matteo Piantedosi, ka deklaruar se ky dekret është vetëm një riaktivizim i funksionit ekzistues të qendrave të ndalimit dhe se qeveria pret një vendim nga Gjykata Evropiane e Drejtësisë për të konfirmuar përputhshmërinë e tij me ligjin ndërkombëtar.

Fillimisht, qendrat në Shqipëri ishin menduar për mbajtjen deri në 28 ditë të azilkërkuesve të shpëtuar në det, por tani periudha e qëndrimit është zgjatur deri në 18 muaj. Kjo nismë synon të lehtësojë presionin mbi sistemin e azilit në Itali, ndërsa mbetet një çështje e debatueshme brenda vendit.