Kryeministrja italiane Giorgia Meloni ka konfirmuar se do të vazhdojë me planin për sjelljen e azilkërkuesve në Shëngjin, pavarësisht një vendimi të gjykatës italiane të premten që shpalli se transferimi i tyre në kampet në Shqipëri është i pavlefshëm.

Sipas gazetës italiane “La Repubblica”, një anije e re pritet të mbërrijë në Shëngjin të mërkurën ose të enjten, megjithatë, nuk janë dhënë detaje të tjera për numrin e azilkërkuesve që do të transferohen.

Në një deklaratë të bërë të premten në mbrëmje, Meloni tha se vendimi i gjykatës do ta detyrojë qeverinë italiane të kërkojë zgjidhje alternative. Ndërkohë, Ministri i Brendshëm i Italisë ka njoftuar se do të apelojnë vendimin e Gjykatës së Romës në shkallët e tjera të gjyqësorit, duke shprehur angazhimin e qeverisë për të vazhduar operacionet në Shëngjin.