Kryeministri Edi Rama ka zhvilluar një bashkëbisedim me qytetarët përmes rubrikës së tij në platformat sociale, “Sy m’sy”, ku u ndal tek çështja e legalizimeve dhe ofrimi i shërbimeve digjitale për qytetarët.

Rama theksoi se procesi i legalizimeve ka shënuar një rritje të ndjeshme, duke krahasuar situatën me vitin kur mori detyrën.

“Kur ne kemi marrë detyrën, ishin pak më shumë se 20 mijë legalizime në total. Sot janë çerek milioni, mbi 240 mijë prona të legalizuara, pjesa dërrmuese e tyre prona familjare. Ka ende për të bërë, por faktet flasin qartë për progresin e arritur,” u shpreh ai.

Zyra asistence në çdo bashki për përdorimin e “e-Albania”

Në vijim, kryeministri njoftoi një vendim të ri për të lehtësuar qytetarët që hasin vështirësi në përdorimin e shërbimeve online. Ai tha se ka dhënë porosi që çdo bashki në Shqipëri të hapë një zyrë të dedikuar asistence për ata që kanë nevojë për ndihmë teknike në platformën “e-Albania”.

“Janë shfaqur individë që shfrytëzojnë ata që nuk e përdorin me sukses celularin ose nuk kanë dikë që t’i ndihmojë. Për këtë arsye, të gjitha bashkitë do të kenë një zyrë të posaçme ku qytetarët mund të marrin asistencë digjitale,” tha Rama.

Ai gjithashtu shtoi se qeveria po punon për avancimin e Inteligjencës Artificiale, ku në gjysmën e dytë të vitit, asistentja digjitale “Diella” pritet të ofrojë shërbime më të avancuara dhe të komunikojë drejtpërdrejt me qytetarët.