Kryeministri Edi Rama shprehet i bindur se kryedemokrati Lulzim Basha nuk mund të fitojë asgjë në zgjedhjet e pjesshme vendore të 6 marsit.

Në një bashkëbisedim me gazetarët në Nju Jork, kreu i qeverisë tha se Basha do i qëndrojë besnik profilit të tij humbës.

Rama nuk ka lënë pa komentuar as “aleancën” mes ish-kryeministrit Sali Berisha dhe Presidentit Ilir Meta.

“Lulzim Basha nuk fiton dot asgjë, asnjëherë në asnjë rast. Siç ka humbur gjithmonë do i qëndrojë besnik sërish profilit të vetë, të humbasë përsëri. Aleanca përmes atyre (Berisha-Meta) të dyve është reale dhe është në veprim dhe do intensifikohet në vijim që të përkufizohet ngjashëmëria e tyre në raport me planetin” – tha Rama.

Kryeministri Edi Rama foli për rolin e Shqipërisë në Këshillin e Sigurisë në OKB.

“Fakti që jam më i gjatë nuk do të thotë që kam kapacitetin që të jap mend dhe të shprehë opinione për gjëra që janë përtej përmasave të vendit që kam nderin të drejtoj. Me vetëdije të plotë për rolin që kemi, mendoj se janë tema që mund të kemi opiniopne gjatë bashkëbisedimeve në kafe. Kur na kërkohet opinion në tryezat e përbashkëta, ne e japim opinionin tonë. Nuk duhet të ngatërrojmë rolin që kemi” – tha Rama.