Kryeministri Edi Rama ka zhvilluar një takim me mbështetësit e tij në parkun e Komitetit Olimpik, ku foli gjerësisht mbi planet për zhvillimin e sportit në vend, si dhe për domosdoshmërinë e rishikimit të ligjit për sponsorizimet.

Në fjalën e tij, Rama theksoi se problemi i mbështetjes për kampionët shqiptarë është zgjidhur dhe se askush prej tyre nuk endet më rrugëve. Sipas tij, Komiteti Olimpik dhe federatat sportive kanë një rol të rëndësishëm, por buxheti aktual është i pamjaftueshëm.

“Me siguri do e nisim vitin e ardhshëm me rritjen e buxhetit të Komitetit Olimpik,” u shpreh Rama, duke shtuar se “ka ardhur koha të ulemi dhe ta diskutojmë me seriozitet ligjin e sponsorizimeve.”

Kryeministri solli si shembull bashkëpunimin me akademinë e famshme të Manchester City-t, e cila po ngrihet në Durrës, duke e cilësuar këtë një hap të jashtëzakonshëm për edukimin sportiv të fëmijëve shqiptarë.

“Shumë shpejt do të kemi të gjithë infrastrukturën e akademisë dhe shkollës në Durrës… do të krijojmë një destinacion rajonal për talentet e futbollit,” tha ai.

Rama zbuloi gjithashtu se janë në proces bisedimesh për ngritjen e një akademie tenisi të Rafa Nadalit në Durrës dhe se NBA ka shprehur interes për hapjen e një akademie basketbolli në rajon, me Shqipërinë si opsionin kryesor.

“Durrësin do e bëjmë një destinacion të një kompleksi me akademi sportive,” përfundoi Rama.

Ky projekt synon të kthejë Shqipërinë në një qendër të rëndësishme të edukimit sportiv dhe zhvillimit të talenteve të rinj në rajon.