Ermal Dredha shfaqet në Asamblenë e PS pas dorëheqjes, Rama e vlerëson si më të mirin e Vlorës

Pas dorëheqjes nga drejtimi i Bashkisë së Vlorës, Ermal Dredha u pa sot në Pallatin e Kongreseve, ku po zhvillohen punimet e Asamblesë së Partisë Socialiste.

Kryeministri Edi Rama komentoi largimin e Dredhës, duke theksuar se ai ishte një nga drejtuesit më të mirë që Vlora kishte pasur. Sipas Ramës, dorëheqja nuk lidhet me performancën e Dredhës, por me sfidat e administrimit dhe presionet që lidhen me drejtimin e qytetit.

“Dorëheqja e Ermalit është treguesi i një njeriu që e ndjen, e do Vlorën dhe i vetmi problem që ka është që duke ndenjur për një kohë të gjatë jashtë Vlorës u zbut më shumë seç duhet për të përballuar aravenë,” tha Rama, duke e përshkruar Dredhën si më të mirin në këtë detyrë.

Kryeministri shtoi se situata e Vlorës nuk është vetëm përgjegjësi e kryetarit të bashkisë, por një përgjegjësi e përbashkët ku qytetarët dhe qeveria kanë rol të barabartë në zhvillimin e qytetit.