Flota aktive e mjeteve në Shqipëri ka kaluar shifrën 1 milion në fund të tetëmujorit të këtij viti, duke regjistruar një rritje të ndjeshme prej 41,1% krahasuar me vitin 2020.

Sipas të dhënave të publikuara nga Drejtoria e Përgjithshme e Shërbimeve të Transportit Rrugor (DPSHTRR), rritja nuk është vetëm sasiore, por reflekton edhe një tendencë drejt modernizimit dhe përmirësimit cilësor të automjeteve në qarkullim.

Vetëm gjatë tetë muajve të parë të vitit 2025 janë regjistruar 66.521 mjete të reja, ose 113% më shumë se në të njëjtën periudhë të vitit 2020. Pjesën më të madhe e zënë autoveturat, të cilat përbëjnë 82,1% të totalit, duke treguar orientimin e qytetarëve drejt mjeteve personale dhe urbane.

Veçanërisht domethënëse është rritja e mjeteve të gjeneratës së fundit, të prodhuara brenda tre viteve të fundit, që kapin mbi 13 mijë njësi, ose 106% më shumë se në vitin 2020.

Sipas DPSHTRR, ky trend pasqyron kërkesën gjithnjë e më të lartë të qytetarëve për mjete më të sigurta, më efikase dhe të pajisura me teknologji moderne, duke kontribuar në përmirësimin e cilësisë së transportit rrugor në vend.